اول شي happy 2011 !!
اخر وحدة بالدنيا تبارك بالسنة اليديدة, ما شاء الله علي.
وهم بعد اقول سوون بحط بوست وما احط الا عقب شهر ! منو يقول كسلانة؟
صراحة بالبداية كان عندي وايد اشياء ومواضيع ودي احطها بالبلوق بس من سويتة والافكار معدومة, ليش؟
مممم شقول بعد يا ترى؟؟
مساعة صار شي غريب, قبل لا اقول بسأل سؤال اتمنى تجاوبوني عليه, "على اساس زوار المدونة 100 الي بجاوبون عليه" !
المهم, اذا كان عندكم احد بالبيت نايم ويطلع اصوات غريبة, مو قاعد يتكلم وهو نايم, لاء اصوات مثل بجي او ونه شتسوون؟ تقعدونة؟ ولا تخلونة؟ توة صار فيني هالموقف. اختي نايمة وبحكم غرفنا المتجاورة سمعت اصوات غريبة, بالبداية قلت يمكن تتكلم بالتلفون وطنشت, يمكن يمكن لاني كنت اطالع فيديو ومو متاكدة اذا الصوت منها, عقب ساعة تقريبا ارد اسمع نفس الاصوات , جنها تتكلم بالتلفون على تبجي, استغربت, وصراحةً عشان ما اجذب خفت اروح اطل عليها, الي شايف "the last exorcism" الي صارلة فترة نازل بالسينما راح يقدر موقفي, وكوني الانسانة الخوافة طنشت مرة ثانية, بعدين حسيت لا يكون فيها ياثوم ولا شي ولازم اقعدها؟ مو صح؟ بالنهاية قررت اروح اقعدها, والاكيد اني كنت واقفة برا عند الباب عشان اذا اليني الي فيها حاول يطلع اسكر الباب وانحاش, الاخت المثالية مو؟ انزين رحت قعدتها والغريب انها قعدت بسرعة, واصلا ما تدري جان قاعدة تطلع اصوات ولمة سئلتها حلمانة بشنو تقول مو حلمانة اصلا؟ يمااااا! انا خفت بس طنشت اهيا تصروعت! وسويت روحي البطلة وقلت لها لا عادي ما فيج شي, اذا بتسئلون شسالفتكم بسرعة تخافون؟ ممم بيني وبينكم كانت لنا تجارب سابقة مع العالم الاخر!!! يماااا!! لا اتغشمر اتغشمر, شرايكم بالله بالسالفة؟ مو تستاهل اسوي لها بوست كامل؟؟ 